Mangaku jo, pasti banya dari ngoni yang baca ini suka skali nonton drama korea. Apalagi cewe-cewe wuh… kalo hari libur bisa satu hari full dorang di kamar ba nonton, tida mandi lagi. Apalagi kalo ba nonton drama le Song Joong Ki. Sampe-sampe depe cowo pangge bajalan dorang tida mau. Ckckck.
Penonton-penonton drama Korea di Gorontalo ada banya depe tipe. Baca ini, sapa tau Ngana termasuk disini:
1. Macam Sutradara
Penonton drama korea yang ini dia pas lagi ba nonton dia sio bs tebak-tebak bagimana depe jalan cirita padahal blum abis ini ba nonton. “ohh depe cowo ini pasti mo jadian deng dia, co lia wa…pasti!”. Baru kalo so abis ba nonton kong depe cirita tida sama seperti yang dia bayangkan, mo marah-marah sandiri dia.
2. Pe tida sabaran skali
Dia nonton episode 1-3, dia lia dulu depe jalan cirita bagimana. Baru, pas maso episode 4 dia so langsung skip dia kase capat pelem. Biasanya, yang penonton bagini cuma tertarik deng adegan-adegan tertentu saja,misalkan adegan ti cowo deng ti cewe jadian atau kaweng. tapi kalo so parah, dia langsung nonton episode terakhir.
3. Penanti Oppa-oppa
Bukan opa-opa ti papa deng ti mama pe papa ini, tapi oppa-oppa aktor cowo. Ada yang ba nonton korea cuma mo ba lia te Soong Jong Ki atau te Le Min Hoo, dorang ini tida talalu fokus pa depe drama, yang penting ba lia depe idola. Ckckck 
4. Pasrah saja
Nah kalo penonton ini, dia mo ba nonton dari episode sampe akhir, sambil meresapi depe drama. Sampe-sampe torbawa perasaan pas ba nonton. Huuu ko’u ey. 
Nah kalo ngana, kira-kira maso tipe penonton korea yang mana? Atau masi ada lagi tipe yg lain? 
0 Comments
Post a Comment